“Unibank”, “Bank of Baku” kimi iri bankların kartlardan nağd pulun çıxardılmasına tətbiq etdikləri limitlər nağdsız ödənişlərin artmasına səbəb olub.
Bunu Azərbaycanda ən böyük onlayın ödəniş sistemi olan “Hesab.az”ın yaradıcısı Fərid İsmayılzadə bildirib.
“Nağdlaşdırmaya qoyulan limit bizim ödənişlərin artmasında özünü göstərir. Aldığım məlumata görə, artım POS-terminallarda da qeydə alınmışdır. Mənim fikirimcə, bu gözəl bir təcrübədir. Nəzərə alsaq ki, indi kartla çox yerdə ödəniş etmək mümükündür, bu halda maaş və pensiya kartlarında da limit nə üçün tətbiq edilməməlidir?! Kommunal ödənişlər, benzin, yemək, marketlərdə alış-veriş zamanı nağdsız ödəniş etmək çox asandır. Buna görə, maaş və pensiya kartlarında da nağdsız etmək üçün bəlli limit nəzərdə tutularsa, insanlarda nağdsız ödənişlərdə vərdiş yaranar və zamanla nağdsız ödənişlər artar”.
Qeyd edək ki, banklar kredit və taksit kartı sahiblərinə vəsaitləri nağdlaşdırmaq limiti qoyublar. Məsələn, 500 manatlıq balansın yalnız 100 manatı nağd şəkildə bankomatlardan çıxardıla bilər. Qalan 400 manat, yalnız nağdsız şəkildə xidmət haqlarının və alınan malların dəyərinin ödənilməsinə sərf edilməlidir.
Fərid İsmayılzadə qeyd edir ki, ilkin mərhələdə, pensiya və maaş kartlarında olan vəsaitin 20%-nin nağd çıxardılması qadağan olunarsa, bu kartlar ilə də nağdsız ödənişlər artar:
“Məsələn, 250 manatlıq pensiya kartından yalnız 200 manatı kartdan nağd çıxardıla bilər, qalan 50 manat isə gərək nağdsız ödəniş üçün sərf edilsin. Belə bir limit maaş və pensiya kartlarında da tətbiq olunarsa, çoxlu sayda insanda nağdsız ödəniş vərdişi zamanla formalaşacaqdır”.
