17 May – Dünya Telekommunikasiya və İnformasiya Cəmiyyəti Gününə həsr olunan “Ali məktəb tələbələri arasında informatika üzrə Ümumrespublika Olimpiadası”nın final mərhələsinin qalibləri müəyyən olunub.
Olimpiadanın münsiflər heyətinin qərarı ilə Qafqaz Universitetinin “Qafqaz Programmers” komandası 1-ci, Bakı Ali Neft Məktəbinin “BHOS2” komandası 2-ci, eyni xal toplamış Bakı Dövlət Universitetinin “BDU-4”, Azərbaycan Dövlət Neft və Sənaye Universitetinin “Suicide Squad” və Azərbaycan Texniki Universitetinin “AzTU1” komandaları 3-cü, Milli Aviasiya Akademiyasının “NAA3” və ADA Universitetinin “ADAU_1” komandaları isə eyni sayda məsələ həll etmələrinə baxmayaraq vaxt fərqi ilə 4-cü yerə layiq görülüb.
Azərbaycanın regionlarını təmsil edən ali təhsil müəssisələrinin komandalarının Olimpiadada iştirakının təşviq edilməsi məqsədilə, Olimpiadada ilk dəfə iştirak etməsinə baxmayaraq final mərhələsinə vəsiqə qazanmış və finalda az fərqlə qaliblər sırasına düşə bilməyən Azərbaycan Dövlət Aqrar Universitetinin “Kəpəz” komandasının nəticələri nəzərə alınaraq, müsabiqədən kənar mükafatlandırılması münsiflər heyəti tərəfindən qərara alınıb.
Qaliblər Dünya Telekommunikasiya və İnformasiya Cəmiyyəti Gününə həsr olunan tədbirdə “HP”, “Azerfon” və “Caspian Telekom” şirkətlərinin təqdim etdiyi qiymətli hədiyyələr, habelə Rabitə və Yüksək Texnologiyalar Nazirliyi tərəfindən Fəxri Fərman və diplomlarla mükafatlandırılacaqlar.
Xatırladaq ki, artıq 10-cu ildir ki, Rabitə və Yüksək Texnologiyalar Nazirliyi, Heydər Əliyev Fondu, Təhsil Nazirliyi və AMEA-nın İnformasiya Texnologiyaları İnstitutunun birgə təşkilatçılığı ilə keçirilən Olimpiadanın 16 aprel 2016-cı il tarixində Qafqaz Universitetində keçirilmiş ilk mərhələsində respublikanın 22 təhsil müəssisəsindən 55 komanda iştirak etmişdi. 13 ali təhsil müəssisəsindən ən yaxşı nəticə göstərən 13 komanda Olimpiadanın final mərhələsinə vəsiqə qazanmışdı
