Azərbaycan Qadınlarının İKT Klubu — FEMMES DIGITALES ənənəvi olaraq Beynəlxalq Telekommunikasiya İttifaqı tərəfindən təsis edilmiş İKT-də Qızlar Beynəlxalq Gününü qeyd edib. ADA Universitetində Microsoft Azərbaycan-la birgə “Azərbaycanın Rəqəmsal Qızları: İKT-də parlaq gələcək. Yeni nəsil qadınlar üçün imkanlar” mövzusunda konfrans keçirilib. Konfransın təşkilatçıları Təhsil Nazirliyi, Rabitə və Yüksək Texnologiyalar Nazirliyi, ADA Universitetinin IT və Mühəndislik Məktəbi (SITE), Azərbaycanda Amerika Ticarət Palatası (AMCHAM), eləcə də Microsoft, “Asan İmza” şirkətləridir.
Tədbirə təhsil, mədəniyyət, məşğulluq və texnologiyalara dair məsələlərlə məşğul olan dövlət qurumlarının nümayəndələrinin, Azərbaycanda fəaliyyət göstərən xarici diplomatik korpusu təmsil edən diplomatların və yüksək vəzifəli şəxslərin, yerli İKT şirkətlərinin rəhbərlərinin, eləcə də bu sahədə çalışan qadın sahibkarların da olduğu 200-dən artıq iştirakçı qatılıb.
Tədbir ərzində başlıca müzakirələr Azərbaycan qızları və qadınları arasında informasiya-kommunikasiya texnologiyaları sektoruna dair məlumatlılıq səviyyəsinin yüksəldilməsi və bu sahəyə peşəkar marağın təşviq edilməsindən ibarət olub.
Konfransın gedişində Microsoft şirkətinin dünya üzrə həyata keçirdiyi “DigiGirlz” layihəsi də təqdim edilib. “DigiGirlz” gənc qadınların elm, texnologiyalar, mühəndislik işi və riyaziyyat sahələrində təhsil almaları üçün investisiyaları nəzərdə tutan layihədir.
Qeyd edək ki, layihə qlobal iqtisadiyyatın çağırışlarına hazır olan gələcəyin peşəkar əmək kadrlarını yetişdirməyi hədəfləyir. Konfransın yekununda Azərbaycanda və ölkə hüdudlarından kənarda İKT sahəsində məhsuldar fəaliyyətinə görə fərqlənən qız və qadınlar üçün FEMMES DIGITALES klubunun illik təqaüdünün təsis edilməsi elan edilib.
