Azərbaycanın mobil proqramı “2016 GİST-İ” beynəlxalq müsabiqəsinin yarımfinalına çıxıb

Azərbaycanın mobil proqramı “2016 GİST-İ” beynəlxalq müsabiqəsinin yarımfinalına çıxıb

Azərbaycandan olan layihə ABŞ-da keçirilən “2016 GİST-İ” beynəlxalq müsabiqəsinin yarımfinalına çıxıb. 135 ölkə arasında keçirilən müsabiqədə, ümumilikdə, 1075 ərizə qəbul olunub. Azərbaycandan təqdim olunan “HealthBox” adlı innovativ layihə beynəlxalq ekspertlər tərəfindən müsbət qiymətləndirilib.

Sözügedən mobil proqram xəstələrin tibbi xidmətlərə əlçatanlığını yüksəltmək üçün nəzərdə tutulub. Proqram xəstələrə öz sağlamlıqları ilə əlaqədar məlumatları bilavasitə tibb müəssisə və apteklərə göndərməyə imkan verən mobil tətbiqdir.

Azərbaycandan olan layihənin finala keçməsini isə aprelin 1-dən mayın 1-dək keçiriləcək ictimai səsvermə həll edəcək. İctimai səsvermədə hər bir şəxs gündə bir dəfə olmaqla, səs verə biləcək. Yarımfinala çıxmış 102 layihə arasında ən çox səs yığan 30 layihə seçiləcək. Finalçılar Elm və Texnologiya üzrə Qlobal Sammitdə öz işlərini təqdim edəcəklər.

Qeyd edək ki, hər il sammitin açılışını ABŞ prezidenti Barak Obama şəxsən özü elan edir. Bu il finalçılar ABŞ Prezidenti ilə görüşmək, layihələrinin inkişafı üçün investisiya cəlb etmək, qlobal elm, texnologiya sahəsində faydalı əlaqələr qurmaq, investorlarla qarşılaşmaq imkanı əldə edəcəklər.

Səs vermək istəyən hər bir şəxs, bu linkə keçid alaraq, siyahıda Azərbaycandan olan layihəni seçərək, gündə bir dəfə səs verə bilər www.gistnetwork.org/tech-i/vote . Eyni zamanda səs verənlər, öz ölkəsini 2017-ci ildə keçiriləcək GİST regional təlim düşərgəsinə nominasiya edə bilər.

Elm və Texnologiya üzrə Qlobal Sammit – “2016 GİST-İ” ABŞ Dövlət Departamenti və Amerika Elmə Dəstək Assosiasiyası (AAAS) tərəfindən hər il keçirilən müsabiqədir. Qlobal sammit bu il iyunun 20-24-də Kaliforniya ştatının Silikon Vadisində keçiriləcək.